കാപ്പാട് ബീച്ച് സഞ്ചാരികള്‍ക്കായി തുറന്നു

കോഴിക്കോട്: കോവിഡ് മാനദണ്ഡങ്ങള്‍ പാലിച്ചുകൊണ്ട് കാപ്പാട് ബീച്ച് സഞ്ചാരികള്‍ക്കായി തുറന്നു. പ്രകൃതി സൗഹൃദ ബീച്ചുകള്‍ക്ക് ലഭിക്കുന്ന അന്താരാഷ്ട്ര ബഹുമതിയായ ബ്ലൂ ഫ്‌ളാഗ് സര്‍ട്ടിഫിക്കേഷന്‍ ലഭിച്ച കേരളത്തിലെ ഏക ബീച്ചാണ് കാപ്പാട്.

സര്‍ക്കാര്‍ നിര്‍ദ്ദേശപ്രകാരം ഒരു മണിക്കൂര്‍ മാത്രമേ വാഹന പാര്‍ക്കിങ് അനുവദിക്കൂ. ഇരുചക്രവാഹനങ്ങള്‍ക്ക് 10 രൂപ, മുച്ചക്ര/നാലുചക്ര വാഹനങ്ങള്‍ക്ക് 30 രൂപ, ബസ്/ഹെവി വാഹനങ്ങള്‍ക്ക് 50 രൂപയുമാണ് മണിക്കൂറിന് പാര്‍ക്കിംഗ് നിരക്ക്.

പ്രവേശനം മാത്രം അനുവദിക്കുന്ന സ്റ്റാന്‍ഡേര്‍ഡ് ടിക്കറ്റിന് തദ്ദേശവാസികളില്‍ നിന്നും 10 രൂപയും മറ്റുള്ളവരില്‍ മുതിര്‍ന്നവരില്‍ നിന്നും 50 രൂപയും കുട്ടികളില്‍ നിന്ന് 25 രൂപയും ഈടാക്കും. കടലില്‍ കുളിക്കാനുള്ള സൗകര്യം കൂടി ഉള്‍പ്പെടുന്ന പ്രീമിയം ടിക്കറ്റിന് മുതിര്‍ന്നവര്‍ക്ക് 100 രൂപയും കുട്ടികള്‍ക്ക് 50 രൂപയും വിദേശ പൗരന്മാരില്‍ മുതിര്‍ന്നവര്‍ക്ക് 150 രൂപയും കുട്ടികള്‍ക്ക് 75 രൂപയുമാണ് നിരക്ക്.