കൂടുതല്‍ കാലം ജീവിക്കാം; വേണ്ടത് ശുഭാപ്തിവിശ്വാസം മാത്രം

കൂടുതല്‍ ശുഭാപ്തിവിശ്വാസമുള്ള വ്യക്തികള്‍ കൂടുതല്‍ കാലം ജീവിക്കാനും അസാധാരണമായ ദീര്‍ഘായുസ്സ് നേടാനും സാധ്യതയുണ്ടെന്ന് ഗവേഷകര്‍ കണ്ടെത്തി. ബോസ്റ്റണ്‍ സര്‍വകലാശാലയിലെ അസിസ്റ്റന്റ് പ്രൊഫസര്‍ ലെവിന ലീയുടെ നേതൃത്വത്തിലുള്ള സംഘമാണ് ഈ വിഷയത്തെ അടിസ്ഥാനമാക്കി ഗവേഷണം നടത്തിയത്. പ്രൊസീഡിംഗ്‌സ് ഓഫ് നാഷണല്‍ അക്കാദമി ഓഫ് സയന്‍സസ് ജേര്‍ണലിലാണ് പഠന റിപ്പോര്‍ട്ട് പ്രസിദ്ധീകരിച്ചിട്ടുള്ളത്.

‘ഈ പഠനത്തിന് വളരെയേറെ പൊതുജനാരോഗ്യ പ്രസക്തിയുണ്ടെന്ന് പ്രൊഫസര്‍ ലെവിന ലീ പറയുന്നു. കാരണം മനുഷ്യന്റെ ആയുസ്സ് വര്‍ദ്ധിപ്പിക്കാന്‍ കഴിവുള്ള മന:ശാസ്ത്രപരമായ സ്വത്താണ് ശുഭാപ്തിവിശ്വാസം. താരതമ്യേന ലളിതമായ സാങ്കേതികതകളോ ചികിത്സകളോ ഉപയോഗിച്ച് ശുഭാപ്തിവിശ്വാസം പരിഷ്‌കരിക്കപ്പെടാമെന്നും അദ്ദേഹം കൂട്ടിച്ചേര്‍ത്തു. രോഗങ്ങള്‍ക്കും അകാലമരണത്തിനുമുള്ള നിരവധി അപകടസാധ്യതകള്‍ ഗവേഷണങ്ങളില്‍ കണ്ടെത്തിയിട്ടുണ്ട്. എന്നാല്‍ ആരോഗ്യകരമായ വാര്‍ദ്ധക്യത്തെ പ്രോത്സാഹിപ്പിക്കുന്ന നല്ല മാനസിക സാമൂഹിക ഘടകങ്ങളെക്കുറിച്ച് വളരെക്കുറച്ചേ മാത്രമേ കണ്ടെത്താന്‍ കഴിഞ്ഞുള്ളൂ എന്നും പ്രൊഫസര്‍ ലീ പറഞ്ഞു.

69,744 സ്ത്രീകളെയും 1,429 പുരുഷന്മാരെയും അടിസ്ഥാനമാക്കിയാണ് ഈ വിഷയത്തെ കുറിച്ച് പഠനം നടത്തിയത്. ഇതിനായി സ്ത്രീകളെ 10 വര്‍ഷവും പുരുഷന്മാരെ 30 വര്‍ഷവും പഠനവിധേയമാക്കി. രണ്ട് ഗ്രൂപ്പുകളുടെയും ശുഭാപ്തിവിശ്വാസം വിലയിരുത്തുന്നതിനുള്ള സര്‍വേ നടപടികളോടൊപ്പം അവരുടെ ഭക്ഷണക്രമം, പുകവലി, മദ്യപാനം എന്നിവകൂടി പഠനത്തില്‍ ഉള്‍പ്പെടുത്തി. ഏറ്റവും ശുഭാപ്തി വിശ്വാസികളായ പുരുഷന്മാരും സ്ത്രീകളും ശരാശരി 11 മുതല്‍ 15 ശതമാനം വരെ ആയുര്‍ദൈര്‍ഘ്യം പ്രകടിപ്പിച്ചതായി പഠനം വിലയിരുത്തുന്നു.

പഠന വിധേയമാക്കിയ വ്യക്തികളുടെ പ്രായം, വിദ്യാഭ്യാസനേട്ടം, രോഗങ്ങള്‍, വിഷാദം, മദ്യപാനം, വ്യായാമം, ഭക്ഷണക്രമം, പ്രാഥമിക ശുശ്രൂഷാ സന്ദര്‍ശനങ്ങള്‍ എന്നിവ കണക്കിലെടുത്താണ് ഫല നിര്‍ണ്ണയം നടത്തിയത്. എങ്കിലും ശുഭാപ്തി വിശ്വാസികള്‍ കൂടുതല്‍ കാലം ജീവിക്കുന്നത് എന്തുകൊണ്ടാണെന്നത് ഇപ്പോഴും ചര്‍ച്ചാവിഷയമാണും പ്രൊഫസര്‍ ലീ പറഞ്ഞു.