Agriculture

Entertainment

October 18, 2021

BHARATH NEWS

Latest News and Stories

വൈഗ കാര്‍ഷിക ഉന്നതി മേളയ്ക്ക് ഉജ്ജ്വല തുടക്കം

തൃശ്ശൂര്‍: വൈഗ കാര്‍ഷിക ഉന്നതി മേളയ്ക്ക് ഉജ്ജ്വല തുടക്കം. വൈഗയുടെ അഞ്ചാം പതിപ്പാ തൃശൂര്‍ ടൗണ്‍ഹാളില്‍ ആരംഭിച്ചത്. വിദ്യാഭ്യാസ മന്ത്രി പ്രൊഫസര്‍ സി രവീന്ദ്രനാഥ് മേള ഉദ്ഘാടനം ചെയ്തു. പ്രത്യേകമായി തയ്യാറാക്കിയ ചേന വിളക്ക് തെളിയിച്ചാണ് ഉദ്ഘാടനം നടത്തിയത്. കാര്‍ഷികമേഖലയില്‍ പ്രകടമായ മാറ്റം കൊണ്ടുവരാനും കൃഷിയെ ആധുനിക വല്‍ക്കരിക്കാനും വൈഗക്ക് കഴിഞ്ഞുവെന്ന് മന്ത്രി പറഞ്ഞു. കേരളത്തില്‍ കാര്‍ഷിക വിപ്ലവം നടന്നുവെന്നും കാര്‍ഷികമേഖലയില്‍ അതിശയകരമായ മുന്നേറ്റമാണ് അഞ്ചുവര്‍ഷം നടന്നതെന്നും കേരളത്തിലെ കാര്‍ഷിക നയങ്ങള്‍ മറ്റു സംസ്ഥാനങ്ങളില്‍ നടപ്പാക്കണമെന്നും വിദ്യാഭ്യാസ മന്ത്രി അഭിപ്രായപ്പെട്ടു.

മൂല്യവര്‍ധിത ഉത്പാദനരംഗത്ത് വൈഗയിലൂടെ വന്‍ കുതിച്ചു ചാട്ടമാണ് ഉണ്ടായതെന്ന് അധ്യക്ഷത വഹിച്ച കൃഷിമന്ത്രി വി എസ് സുനില്‍കുമാര്‍ പറഞ്ഞു. വൈഗയിലൂടെ പ്രചോദനം ഉള്‍ക്കൊണ്ട അമ്പതിലധികം സംരംഭകര്‍ ദേശീയ തലത്തിലും അന്തര്‍ സംസ്ഥാന തലത്തിലും അവരുടെ ഉല്‍പ്പന്നങ്ങള്‍ വിപണനം ചെയ്യുന്നുണ്ട്. വൈഗയിലൂടെ വ്യാപകമായി ചക്കയുടെ നിരവധി മൂല്യവര്‍ധിത ഉല്‍പ്പന്നങ്ങള്‍ നിര്‍മിക്കാന്‍ തുടങ്ങിയതോടെ ചക്കയെ സംസ്ഥാന ഫലമായി സര്‍ക്കാര്‍ പ്രഖ്യാപിച്ചു. കേരളത്തിന്റെ പ്രകൃതിദത്ത പോഷകസമൃദ്ധമായ തേന്‍ ‘കേരള ഹണി’ എന്ന പേരില്‍ വൈഗയുടെ വേദിയില്‍ ബ്രാന്‍ഡിങ് നടപ്പിലാക്കുമെന്ന് മന്ത്രി പറഞ്ഞു.

പുതിയ സംരംഭകരുടെ സംരംഭക സഹായത്തിനായി 46 കോടി രൂപ വകയിരുത്തിയിട്ടുണ്ട്. തൃശൂര്‍ ആസ്ഥാനമായി ആരംഭിക്കുന്ന കര്‍ഷക ക്ഷേമനിധി ബോര്‍ഡ് ഈയാഴ്ച ഉദ്ഘാടനം ചെയ്യുമെന്നും കൃഷിമന്ത്രി പറഞ്ഞു. വൈഗയുടെ പ്രധാന ആകര്‍ഷണമായി നടക്കുന്ന വെര്‍ച്വല്‍ എക്‌സിബിഷന്റെ സ്വിച്ച് ഓണ്‍കര്‍മവും കൃഷിവകുപ്പ് മന്ത്രി നിര്‍വഹിച്ചു.

2021 ലെ വൈഗ കലണ്ടര്‍ വിദ്യാഭ്യാസ മന്ത്രിക്ക് നല്‍കി കൃഷിമന്ത്രി പ്രകാശനം ചെയ്തു. ഐക്യരാഷ്ട്രസഭ 2021 വര്‍ഷത്തെ പഴംപച്ചക്കറി വര്‍ഷമായി പ്രഖ്യാപിച്ചത് ആസ്പദമാക്കി ഇടുക്കി ജില്ലയിലെ മണക്കാട് കൃഷി ഓഫീസര്‍ ആനന്ദ് വിഷ്ണു പ്രകാശ് പ്രത്യേകം തയ്യാറാക്കിയതാണ് 2021 വൈഗ കലണ്ടര്‍. പ്രാദേശികമായി ലഭിക്കുന്ന പഴങ്ങളുടെയും പച്ചക്കറികളുടെയും അതത് മാസങ്ങളുടെ ലഭ്യത അടിസ്ഥാനപ്പെടുത്തിയാണ് കലണ്ടര്‍ നിര്‍മിച്ചിട്ടുള്ളത്.

ഫെബ്രുവരി 14 വരെ നഗരത്തിലെ അഞ്ചു വേദികളിലായാണ് വൈഗ മേള നടക്കുക. വിവിധ വിഷയങ്ങളെ അടിസ്ഥാനമാക്കി അഞ്ചുദിവസം കര്‍ഷകര്‍ക്കും കാര്‍ഷിക സംരംഭങ്ങള്‍ക്കും ആയി സാങ്കേതിക സെഷനുകളും കാര്‍ഷിക മേഖലയിലെ നൂതന ആശയങ്ങള്‍ പരിചയപ്പെടുത്തുന്ന പ്രദര്‍ശന സ്റ്റാളുകളും സജ്ജീകരിച്ചിട്ടുണ്ട്. കാര്‍ഷിക സംരംഭകര്‍ക്കായി വെര്‍ച്വല്‍ പ്ലാറ്റ്‌ഫോമില്‍ ബി 2 ബി മീറ്റ്, കാര്‍ഷിക മേഖലയിലെ വിവിധ പ്രശ്‌നങ്ങള്‍ക്ക് പരിഹാരം കണ്ടെത്തുന്നതിന് വിദ്യാര്‍ത്ഥികള്‍, യുവജനങ്ങള്‍, പൊതുജനങ്ങള്‍, കാര്‍ഷിക മേഖലയിലെ വിദഗ്ധര്‍ എന്നിവര്‍ പങ്കുചേരുന്ന അഗ്രി ഹാക്കത്തോണും വൈഗയിലെ പ്രധാന ആകര്‍ഷണമാണ്.