നിയമസഭാ തിരഞ്ഞെടുപ്പ്: രാഷ്ട്രീയ പാര്‍ട്ടികള്‍ക്ക് തിരഞ്ഞെടുപ്പ് യോഗങ്ങള്‍ക്ക് പ്രത്യേക സ്ഥലങ്ങള്‍ അനുവദിക്കും

ആലപ്പുഴ : നിയമസഭാ തിരഞ്ഞെടുപ്പിനോടനുബന്ധിച്ചു വിവിധ രാഷ്ട്രീയ പാര്‍ട്ടികള്‍ക്ക് യോഗങ്ങള്‍ ചേരാനുള്ള പ്രത്യേക സ്ഥലങ്ങള്‍ അനുവദിച്ചു നല്‍കും. ജില്ലയിലെ ഒമ്പത് നിയോജക മണ്ഡലങ്ങളിലുമായി നിയോഗിച്ചിട്ടുള്ള തിരഞ്ഞെടുപ്പ് റിട്ടേണിങ് ഉദ്യോഗസ്ഥരുടെ അനുമതിയോടെയാകും ഇങ്ങനെ സ്ഥലങ്ങള്‍ അനുവദിക്കുക. ഇതിനായി ഓരോ നിയോജക മണ്ഡലത്തിലും സ്ഥലങ്ങള്‍ കണ്ടെത്തി നല്‍കാന്‍ റിട്ടേണിങ് ഓഫീസര്‍മാര്‍ക്ക് ജില്ല തിരഞ്ഞെടുപ്പ് ഉദ്യോഗസ്ഥന്‍ കൂടിയായ ജില്ല കളക്ടര്‍ എ അലക്‌സാണ്ടര്‍ നിര്‍ദേശം നല്‍കി. കളക്ടറേറ്റില്‍ ചേര്‍ന്ന റിട്ടണിങ് ഉദ്യോഗസ്ഥരുടെയും അസിസ്റ്റന്റ് റിറ്റേണിങ് ഉദ്യോഗസ്ഥരുടെയും യോഗത്തിലാണ് തീരുമാനം.

അതാത് നിയോജക മണ്ഡലങ്ങളില്‍ തിരഞ്ഞെടുത്തിട്ടുള്ള സ്‌ട്രോങ്ങ് റൂമുകളുടെ സജ്ജീകരണങ്ങള്‍, ബൂത്ത് മാനേജ്‌മെന്റ് പ്ലാന്‍ എന്നിവ വേഗത്തില്‍ തീര്‍ക്കാനും ഉദ്യോഗസ്ഥര്‍ക്ക് നിര്‍ദ്ദേശം നല്‍കി. കോവിഡ് പശ്ചാത്തലത്തില്‍ ബൂത്തുകളില്‍ തിരഞ്ഞെടുപ്പ് ദിവസം മൂന്ന് പേരെ അധികമായി നിയോഗിക്കും. വോട്ടര്‍മാരെ തെര്‍മല്‍ സ്‌കാനര്‍ ഉപയോഗിച്ച് പരിശോധിക്കുന്നതിനായി രണ്ട് പേര്‍, വോട്ടര്‍മാരുടെ ക്യൂ നിയന്ത്രിക്കുന്നതിനായി ഒരാള്‍ എന്നിങ്ങനെയാണ് നിയമിക്കേണ്ടത്.

അംഗന്‍വാടി അധ്യാപകര്‍, ആശാ പ്രവര്‍ത്തകര്‍ അല്ലെങ്കില്‍ വോളണ്ടിയര്‍മാര്‍ എന്നിവരെയാണ് ഇതിനായി നിയോഗിക്കുക. തിരഞ്ഞെടുപ്പ് ഉദ്യോഗസ്ഥര്‍ക്കുള്ള പരിശീലന ക്ലാസ്സ് സമയ ബന്ധിതമായി സംഘടിപ്പിക്കുവാനും കളക്ടര്‍ നിര്‍ദേശം നല്‍കിയിട്ടുണ്ട്.