പാലാരിവട്ടം പാലം തുറന്നു, നൂറുവര്‍ഷത്തെ ഈട് ഉറപ്പെന്ന് മന്ത്രി ജി സുധാകരന്‍

കൊച്ചി: പുതുക്കിപ്പണിത പാലാരിവട്ടം പാലം തുറന്നു. തെരഞ്ഞെടുപ്പ് പെരുമാറ്റച്ചട്ടം നിലനില്‍ക്കുന്നതിനാല്‍ ദേശീയപാതാ വിഭാഗം ചീഫ് എന്‍ജിനീയറാണ് വൈകിട്ട് നാലിന് പാലം തുറന്നു നല്‍കിയത്. റെക്കോര്‍ഡ് സമയം കൊണ്ടാണ് പാലം പൂര്‍ത്തിയാക്കിയത്. 5 മാസവും 10 ദിവസവും മാത്രം എടുത്താണ് പാലം പുനര്‍നിര്‍മ്മിച്ചത്. മെട്രോമാന്‍ ഇ ശ്രീധരന്റെ നേതൃത്വത്തിലാണ് പാലം നിര്‍മ്മിച്ചത്.

നിര്‍മാണത്തിലെ അപാകതകളെത്തുടര്‍ന്ന് വിള്ളല്‍ കണ്ടെത്തിയ പാലം 2019 മെയ് ഒന്നിനാണ് അടച്ചിട്ടത്. കഴിഞ്ഞ സെപ്റ്റംബറില്‍ പുനര്‍നിര്‍മാണം ആരംഭിച്ച് അഞ്ചര മാസം കൊണ്ടാണ് പണി പൂര്‍ത്തിയായത്.

ഗതാഗത മന്ത്രി ജി സുധാകരനും ഉന്നത ഉദ്യോഗസ്ഥരും തുറന്നുകൊടുക്കുന്നതിന് മുന്നോടിയായി നേരത്തെ തന്നെ സന്ദര്‍ശിച്ചിരുന്നു. നൂറുവര്‍ഷത്തെ ഈട് ഉറപ്പാക്കിയ ശേഷമാണ് പാലം ഗതാഗതത്തിനു തുറന്നു കൊടുക്കുന്നത് എന്ന് ഗതാഗത മന്ത്രി ജി സുധാകരന്‍ വ്യക്തമാക്കി.

അതേസമയം ഉദ്ഘാടന ദിനം പാലാരിവട്ടം പാലത്തില്‍ ചെറിയ അപകടം. കാറിലേക്ക് ട്രക്ക് വന്ന് തട്ടിയാണ് അപകടമുണ്ടായത്. ചെറിയ പോറല്‍ മാത്രമേ വണ്ടിക്ക് സംഭവിച്ചുള്ളു. ഉദ്ഘാടനം നടന്ന് നിമിഷങ്ങള്‍ക്കകമാണ് അപകടം. എന്നാല്‍ സംഭവത്തില്‍ ആര്‍ക്കും പരുക്കേറ്റില്ല. വാഹനത്തിനും വലിയ പരുക്ക് പറ്റിയിട്ടില്ല.