Agriculture

Entertainment

January 31, 2023

BHARATH NEWS

Latest News and Stories

കോണ്‍ഗ്രസില്‍ പൊട്ടിത്തെറി: ലതികാ സുഭാഷ് പാര്‍ട്ടി വിട്ടു

തിരുവനന്തപുരം: മഹിളാ കോണ്‍ഗ്രസ് അധ്യക്ഷയും കോണ്‍ഗ്രസ് സംസ്ഥാന ജനറല്‍ സെക്രട്ടറിയുമായ ലതിക സുഭാഷ് കോണ്‍ഗ്രസ് വിട്ടു. സ്ഥാനാര്‍ഥിത്വം കിട്ടാത്തതിനെ തുടര്‍ന്നാണിത്. കെ പി സി സി ആസ്ഥാനത്തിനു മുന്നില്‍ തലമുണ്ഡനം ചെയ്തായിരുന്നു പ്രതിഷേധം. ചെന്നിത്തലയുടെ ഐശ്വര്യ കേരള യാത്രയില്‍ മുഖ്യ പ്രാസംഗിക കൂടിയായിരുന്നു ലതിക സുഭാഷ്. തിരുത്തല്‍ ശക്തിയായി താന്‍ ഉണ്ടാകുമെന്ന് ലതികാ സുഭാഷ് പ്രഖ്യാപിച്ചു. ഏറ്റുമാനൂരില്‍ സ്വതന്ത്രയായി മത്സരിക്കണോ എന്ന കാര്യം തീരുമാനിച്ചിട്ടില്ലെന്നും അവര്‍ പറഞ്ഞു.

കോണ്‍ഗ്രസ് സ്ഥാനാര്‍ത്ഥി പട്ടികയില്‍ വനിതകളെ തഴഞ്ഞുവെന്ന് ലതികാ സുഭാഷ് പറഞ്ഞു. ഇതില്‍ അതിയായ ദുഃഖമുണ്ടെന്നും 20 ശതമാനം സീറ്റ് വനിതകള്‍ക്ക് മാറ്റിവെക്കണമെന്നും ആവശ്യപ്പെട്ടിരുന്നതായും അവര്‍ അറിയിച്ചു. പാര്‍ട്ടിക്കുവേണ്ടി അലയുന്ന സ്ത്രീകളെ കോണ്‍ഗ്രസ് പരിഗണിച്ചതേ ഇല്ല. ഒരു ജില്ലയില്‍ ഒരു വനിതയെ എങ്കിലും പ്രതീക്ഷിച്ചു. എന്നാല്‍ അതുണ്ടായില്ല. ഷാനിമോള്‍ ഉസ്മാന്‍ അടക്കമുള്ളവര്‍ക്ക് സീറ്റ് കിട്ടിയതില്‍ സന്തോഷിക്കുന്നു.

ഏറ്റുമാനൂര്‍ സീറ്റ് താന്‍ പ്രതീക്ഷിച്ചിരുന്നു. 16 വയസ്സു മുതല്‍ ഈ പ്രസ്ഥാനത്തോടൊപ്പം നില്‍ക്കുന്ന ആളാണ് താന്‍. ഇപ്പോള്‍ എംഎല്‍എമാരായി ഇരിക്കുന്ന അനിയന്മാരേക്കാളും സീനിയോരിറ്റി തനിക്കുണ്ട്. എല്ലാ തെരഞ്ഞെടുപ്പിലും താന്‍ തഴയപ്പെടുകയാണ്.