പശ്ചിമഘട്ടില്‍ കോഴിക്കിളിയെ കണ്ടെത്തി

കേളകം: പശ്ചിമഘട്ടത്തില്‍ നടത്തിയ പക്ഷി സര്‍വ്വേയില്‍ പുതിയ ഇനം കോഴിക്കിളിയെ കണ്ടെത്തി. ആറളം വൈല്‍ഡ് ലൈഫ് ഡിവിഷനും മലബാര്‍ നാച്യുറല്‍ ഹിസ്റ്ററി സൊസൈറ്റിയും ചേര്‍ന്ന് ആറളം, കൊട്ടിയൂര്‍ വന്യജീവി സങ്കേതങ്ങളില്‍ നടത്തിയ 20-ാമത് പക്ഷിസര്‍വ്വേയിലാണ് 14 ഇനം പുതിയ പക്ഷികളെ കണ്ടെത്തിയത്.

കണ്ടെത്തിയവയില്‍ 12 എണ്ണം പശ്ചിമഘട്ടത്തില്‍ തനതായി കാണുന്ന പക്ഷികളാണ്. സര്‍വ്വേയ്ക്ക് ഇടയില്‍ കണ്ടെത്തിയ കോഴിക്കിളിയാണ് പുതുതായി വന്യജീവി സങ്കേതത്തില്‍ രേഖപ്പെടുത്തിയ പക്ഷി. ഇതോടെ ആറളം, കൊട്ടിയൂര്‍ വന്യജീവി സങ്കേതങ്ങളിലായി 247 പക്ഷികളെയാണ് കഴിഞ്ഞ 20 വര്‍ഷത്തിനിടയില്‍ നിന്ന് രേഖപ്പെടുത്തിയിട്ടുള്ളത്.

ആറളം വൈല്‍ഡ് ലൈഫ് ഡിവിഷനും മലബാര്‍ നാച്യുറല്‍ ഹിസ്റ്ററി സൊസൈറ്റിയും ചേര്‍ന്ന് ആറളം, കൊട്ടിയൂര്‍ വന്യജീവി സങ്കേതങ്ങളില്‍ നടത്തിയ 20-ാമത് പക്ഷിസര്‍വ്വേ സമാപിച്ചു. കേരളത്തില്‍ മറ്റൊരു സംരക്ഷിത മേഖലകളിലും പക്ഷികളെ കുറിച്ച് ഇത്രയും നീണ്ട വര്‍ഷങ്ങളിലെ പഠനങ്ങള്‍ നടന്നിട്ടില്ല. ബസ്ര പ്രാപ്പിടിയന്‍, പൊട പൊന്മാര്‍, ത്രിയംഗുലി മരംകൊത്തി, കിന്നരി പ്രാപ്പരുന്ത് എന്നിവയാണ് സര്‍വ്വേയില്‍ രേഖപ്പെടുത്തിയ മറ്റ് പ്രധാന പക്ഷികള്‍.

ആറളം, കൊട്ടിയൂര്‍ വന്യജീവി സങ്കേതങ്ങളിലെ ജീവനക്കാരും തൃശൂര്‍ കേരള ഫോറസ്ട്രി കോളജിലെ കുട്ടികളും 20ഓളം മറ്റ് പക്ഷി നിരീക്ഷികരും പങ്കെടുത്ത സര്‍വേ വൈല്‍ഡ് ലൈഫ് വാര്‍ഡന്‍ എ. ഷജ്‌ന ഉദ്ഘാടനം ചെയ്തു. അസി. വൈല്‍ഡ് ലൈഫ് വാര്‍ഡന്‍ എന്‍. അനില്‍കുമാര്‍ സ്വാഗതം പറഞ്ഞു. പക്ഷിനിരീക്ഷകരായ സത്യന്‍ മേപ്പയൂര്‍, റോഷ്‌നാഥ് രമേശ്, ഡെപ്യൂട്ടി റേഞ്ച് ഓഫിസര്‍ ജയേഷ് ജോസഫ് എന്നിവര്‍ സംസാരിച്ചു.