ഒളിംപിക്‌സ്: ഗുസ്തിയില്‍ ബജ്‌രംഗ് പുനിയക്ക് വെങ്കലം

ടോക്കിയോ: ഗുസ്തിയില്‍ ഇന്ത്യയുടെ ബജ്‌രംഗ് പുനിയക്ക് വെങ്കലം. 65 കിലോ വിഭാഗത്തില്‍ കസാക്കിസ്ഥാന്‍ താരത്തെ തോല്‍പിച്ചാണ് മെഡല്‍ നേട്ടം. 80 എന്ന ആധികാരിക സ്‌കോറിലാണ് ബജ്‌രംഗിന്റെ ജയം. വെങ്കല മെഡലിനായുള്ള പോരാട്ടത്തില്‍ കസാക്കിസ്ഥാന്റെ ദൗലത് നിയാസ്‌ബെക്കോവിനെയാണ് ബജ്‌രംഗ് തോല്‍പ്പിച്ചത്.

ബജ്‌രംഗ് പുനിയ ഹരിയാനയിലെ ജജ്ജാര്‍ ജില്ലയിലെ ഖുദാന്‍ ഗ്രാമത്തിലാണ് ജനിച്ചത്. പിതാവിന്റെ പ്രോത്സാഹനത്തെ തുടര്‍ന്ന് ഏഴാം വയസില്‍ അദ്ദേഹം ഗുസ്തി പരിശീലനം ആരംഭിച്ച താരം 2013ല്‍ ന്യൂഡല്‍ഹിയില്‍ നടന്ന ഏഷ്യന്‍ റെസ്ലിങ് ചാമ്പ്യന്‍ഷിപ്പ് പുരുഷ വിഭാഗം 60 കിലോ ഫ്രീസ്‌റ്റൈല്‍ വിഭാഗത്തില്‍ വെങ്കല മെഡല്‍ നേടിയാണ് രാജ്യാന്തര ശ്രദ്ധ ആകര്‍ഷിക്കുന്നത്. അതേ വര്‍ഷം ഹംഗറിയിലെ ബുഡാപെസ്റ്റില്‍ നടന്ന ലോക ഗുസ്തി ചാമ്പ്യന്‍ഷിപ്പിലും വെങ്കലം നേടിയ ബജ്‌രംഗ് 2014 ല്‍ ഇഞ്ചിയോണ്‍ ഏഷ്യന്‍ ഗെയിംസിലും ഗ്ലാസ്‌ഗോയില്‍ നടന്ന കോമണ്‍വെല്‍ത്ത് ഗെയിംസിലും വെള്ളിയും സ്വന്തമാക്കിയിട്ടുണ്ട്.

2018 കോമണ്‍വെല്‍ത്ത് ഗെയിംസിലും 2018 ജക്കാര്‍ത്ത ഏഷ്യന്‍ ഗെയിംസിലും സ്വര്‍ണവും നേടിയിട്ടുണ്ട്. അര്‍ജ്ജുന അവാര്‍ഡ് 2015ല്‍ രാജ്യം അര്‍ജുനാ അവാര്‍ഡും 2019ല്‍ പത്മശ്രീയും ഖേല്‍ രത്‌ന അവാര്‍ഡും നല്‍കി ആദരിച്ച ബജ്‌രംഗ് പൂനിയ നിലവില്‍ ഇന്ത്യന്‍ റെയില്‍വേയില്‍ ടി.ടി.ഇ. (ട്രാവല്‍ ടിക്കറ്റ് എക്‌സാമിനര്‍) തസ്തികയില്‍ ജോലി ചെയ്യുകയാണ്.