നെയ്യാറ്റിന്‍കര ജനറല്‍ ആശുപത്രിക്ക് പുതിയ ലാബ്

തിരുവനന്തപുരം: നെയ്യാറ്റിന്‍കര ജനറല്‍ ആശുപത്രിയില്‍ പുതിയതായി സ്ഥാപിച്ച ഹിന്ദ്‌ലാബ്‌സ്‌ കെ ആന്‍സലന്‍ എം എല്‍ എ ഉദ്ഘാടനം ചെയ്തു. ആശുപത്രിയുടെ ഭൗതിക സാഹചര്യങ്ങള്‍ മെച്ചപ്പെടുത്തുന്നതിന്റെ ഭാഗമായി ഹിന്ദുസ്ഥാന്‍ ലാറ്റക്‌സിന്റെ സഹകരണത്തോടെയാണ് പുതിയ ലാബ് സ്ഥാപിച്ചിരിക്കുന്നത്.

സ്വകാര്യ സ്ഥാപനങ്ങളേക്കാളും 50 ശതമാനം കുറഞ്ഞ നിരക്കിലാണ് ഇവിടെ സ്‌കാനിംഗ് സൗകര്യം ഏര്‍പ്പെടുത്തിയിരിക്കുന്നത്. ഹൃദ്രോഗ നിര്‍ണയത്തിനുള്ള ഇക്കോ സ്‌കാനിംഗ് 700, ഡോപ്ലര്‍ സ്‌കാനിംഗ് 600, അള്‍ട്രാ സൗണ്ട് സ്‌കാനിംഗ് 350 രൂപ എന്നിങ്ങനെയാണ് നിരക്കുകള്‍. സി ടി സ്‌കാനിംഗ് സ്ഥാപിക്കുന്നതിന് ടെന്‍ഡര്‍ നടപടികള്‍ ആരംഭിച്ചിട്ടുണ്ട്.

ജില്ലാ പഞ്ചായത്ത് പ്രസിഡന്റ് അഡ്വ. ഡി സുരേഷ് കുമാര്‍ ഉപകരണങ്ങളുടെ സ്വിച്ച് ഓണ്‍ നിര്‍വഹിച്ചു. നെയ്യാറ്റിന്‍കര മുനിസിപ്പല്‍ ചെയര്‍മാന്‍ പി കെ രാജ്‌മോഹനന്‍, ആശുപത്രി സൂപ്രണ്ട് ഡോ. വത്സല, ഹിന്ദുസ്ഥാന്‍ ലാറ്റക്‌സ് ഡി.ജി.എം എ. ജയകുമാര്‍, സീനിയര്‍ മാനേജര്‍ വി.പി പ്രശാന്ത്, ഡെപ്യൂട്ടി മാനേജര്‍ ശ്രീജിത്ത് മോഹന്‍, ഹോസ്പിറ്റല്‍ മാനേജ്‌മെന്റ് കമ്മിറ്റി അംഗം വി കേശവന്‍ കുട്ടി തുടങ്ങിയവര്‍ പങ്കെടുത്തു.