അടച്ചിട്ട ഇന്ത്യൻ എംബസികളിൽ താലിബാൻ റെയ്ഡ്. വാഹനങ്ങൾ കടത്തിയതായും സൂചന

കാബൂള്‍: അഫ്ഗാനിസ്ഥാനിലെ അടഞ്ഞു കിടക്കുന്ന ഇന്ത്യന്‍ കോണ്‍സുലേറ്റുകളില്‍ പരിശോധന നടത്തി താലിബാന്‍.കോണ്‍സുലേറ്റിന്‍റെ വാഹനങ്ങള്‍ താലിബാന്‍ കൊണ്ടുപോയതായി സര്‍ക്കാര്‍ വൃത്തങ്ങള്‍ പറഞ്ഞു.അഫ്ഗാനിസ്ഥാനിലെ നാല് കോണ്‍സുലേറ്റുകള്‍ നേരത്തെ ഇന്ത്യ അടച്ചുപൂട്ടിയിരുന്നു. ജലാലാബാദ്, കണ്ഡഹാര്‍, ഹെറാത്, മഷാറെ ഇ ഷെറീഫ് കോണ്‍സുലേറ്റുകള്‍ പൂട്ടിയാണ് ജീവനക്കാരെ ഒഴുപ്പിച്ചത്. ഈ കോണ്‍സുലേറ്റുകളില്‍ സായുധരായ താലിബാന്‍കാരെത്തി പരിശോധന നടത്തി എന്നാണ് സര്‍ക്കാരിന് കിട്ടിയിരിക്കുന്ന വിവരം. കോണ്‍സുലേറ്റുകള്‍ക്കുള്ളിലെ രേഖകള്‍ പരിശോധിച്ച താലിബാന്‍, രണ്ട് കോണ്‍സുലേറ്റുകളിലെ വാഹനങ്ങള്‍ കൊണ്ടുപോയി. അതേസമയം, കാബൂളിലെ ഇന്ത്യന്‍ എംബസിക്ക് അകത്ത് താലിബാന്‍ കയറിയിട്ടില്ല. രണ്ട് പ്രാദേശിക സുരക്ഷ ഉദ്യോഗസ്ഥര്‍ ഇപ്പോഴും എംബസിയിലുണ്ട്. കാബൂളിലെ എംബസി ഇന്ത്യ അടക്കരുതെന്ന് താലിബാന്‍ ആവശ്യപ്പെട്ടിരുന്നുവെന്നും സര്‍ക്കാര്‍ വൃത്തങ്ങള്‍ പറഞ്ഞു.കാബൂളിൽ നിന്നുള്ള റിപ്പോർട്ടുകൾ പ്രകാരം, ഭീകരസംഘടനയുടെ തലവനും താലിബാൻ ഉപനേതാവുമായ സിറാജുദ്ദീൻ ഹഖാനിയുടെ സഹോദരൻ അനസ് ഹഖാനിയുടെ നേതൃത്വത്തിലുള്ള ഹഖാനി നെറ്റ്‌വർക്കിന്റെ ആറായിരത്തോളം കേഡർ തലസ്ഥാന നഗരത്തിന്റെ നിയന്ത്രണം ഏറ്റെടുത്തു.