100 ദിനങ്ങൾ 100 കാർഷിക ആഴ്ച ചന്തകൾ പൂർത്തീകരണ പ്രഖ്യാപനം മന്ത്രി പി. പ്രസാദ്  നിർവഹിക്കും

തിരുവനന്തപുരം: സംസ്ഥാന സർക്കാരിന്റെ 100 ദിന കർമ്മ പദ്ധതികളുടെ ഭാഗമായി കാർഷിക വികസന കർഷക ക്ഷേമ വകുപ്പിന്റെ നേതൃത്വത്തിൽ സംസ്ഥാനത്ത് 100 നഗര വഴിയോര ആഴ്ചചന്ത കളുടെ രൂപീകരണം പൂർത്തിയായിരിക്കുകയാണ്. 100 നഗര വഴിയോര ആഴ്ച ചന്തകളുടെ പൂർത്തീകരണ പ്രഖ്യാപനവും നൂറാമത് ആഴ്ച ചന്തയുടെ ഉദ്ഘാടനവും 31 ന് വൈകുന്നേരം 4 മണിക്ക് കൃഷിമന്ത്രി പി.പ്രസാദ് ഓൺലൈനായി നിർവഹിക്കും.

എറണാകുളത്ത് അങ്കമാലി – കാലടി റോഡിലെ മൂലൻസ് ഹൈപ്പർ മാർക്കറ്റിന് സമീപത്തായാണ് 100-മത് ആഴ്ച ചന്ത കൃഷിവകുപ്പ് ആരംഭിക്കുന്നത്. അങ്കമാലി എംഎൽഎ റോജി എം ജോൺ ന്റെ അധ്യക്ഷതയിൽ ആയിരിക്കും ഉദ്ഘാടന ചടങ്ങുകൾ നടക്കുന്നത്. കർഷകരിൽ നിന്നുള്ള നാടൻ ഉൽപ്പന്നങ്ങൾ നേരിട്ട് കർഷകർ, കർഷക ഗ്രൂപ്പുകൾ,കർഷകമിത്ര എന്നിവർക്ക് നഗരപ്രദേശങ്ങളിലെ ഉപഭോക്താക്കൾക്ക് എത്തിക്കുവാനുള്ള ഒരു സംവിധാനമാണ് ആഴ്ചചന്തകൾ കൊണ്ട് ഉദ്ദേശിക്കുന്നത്.

നഗരപ്രദേശങ്ങളിൽ നിശ്ചിത സ്ഥലത്ത് അടിസ്ഥാന സൗകര്യങ്ങൾ മാത്രം ഒരുക്കിക്കൊണ്ട് ചന്തകൾ ആഴ്ചയിൽ അഞ്ച് ദിവസം പ്രവർത്തിക്കുന്നതായിരിക്കും. അടിസ്ഥാന സൗകര്യങ്ങൾ സജ്ജീകരിക്കുന്നതിനും ഉൽപന്നങ്ങൾ വിപണിയിലെത്തിക്കുന്നതിനുമായി ചന്ത ഒന്നിന് 10,000 രൂപ വീതമാണ് കൃഷിവകുപ്പ് നൽകുന്നത്. പരമാവധി ഇടനിലക്കാരെ ഒഴിവാക്കി കർഷകർക്ക് തന്നെ ഉത്പന്നങ്ങൾ നഗരപ്രദേശത്ത് എത്തിച്ച് വിപണനം നടത്തി മെച്ചപ്പെട്ട വില നേടിയെടുക്കാം എന്നുള്ളതാണ് പ്രത്യേകത. ഫ്രഷ് ആയി തന്നെ നാടൻ വിഭവങ്ങൾ ലഭ്യമാകുമെന്നതിനാൽ ഉപഭോക്താക്കൾക്ക് ആഴ്ചചന്തകളോട് പ്രിയ മേറെയാണ്.വിവിധ ജില്ലകളിലായി 100 ആഴ്ച ചന്തകൾ പൂർത്തിയായിട്ടുണ്ട് .