Agriculture

Entertainment

December 2, 2022

BHARATH NEWS

Latest News and Stories

ഇന്ത്യന്‍ വിദ്യാര്‍ത്ഥി കൊല്ലപ്പെട്ട സംഭവത്തില്‍ അന്വേഷണം നടത്തുമെന്ന് റഷ്യ: അനുശോചനം അറിയിച്ച്‌ റഷ്യന്‍ അംബാസിഡര്‍.

ന്യൂഡല്‍ഹി: യുക്രേനിയന്‍ നഗരമായ ഖാര്‍കീവില്‍ ഇന്ത്യന്‍ വിദ്യാര്‍ത്ഥി കൊല്ലപ്പെട്ട സംഭവം അന്വേഷിക്കുമെന്ന് റഷ്യ.

ഇന്ത്യയിലെ റഷ്യന്‍ അംബാസിഡറായ ഡെനിസ് അലിപോവ് ആണ് ഇക്കാര്യം അറിയിച്ചത്.
കര്‍ണാടകയിലെ ഹവേരി ജില്ലയിലെ ചാലഗേരി സ്വദേശിയായ നവീന്‍ ശേഖരപ്പ ജ്ഞാനഗൗഡര്‍ ഇന്നലെയാണ് ഖാര്‍കീവില്‍ നടന്ന റഷ്യന്‍ ആക്രമണത്തില്‍ കൊല്ലപ്പെട്ടത്. നവീന്‍ ശേഖരപ്പയുടെ നിര്യാണത്തില്‍ യുവാവിന്റെ കുടുംബത്തോടും ഇന്ത്യന്‍ ജനതയോടും റഷ്യ അനുശോചനം അറിയിക്കുന്നതായും അലിപോവ് പറഞ്ഞു.

യുക്രെയ്‌നിലെ സംഘര്‍ഷ മേഖലകളില്‍ കുടുങ്ങിക്കിടക്കുന്ന ഇന്ത്യന്‍ പൗരന്മാരുടെ സുരക്ഷ ഉറപ്പാക്കാന്‍ റഷ്യ സാധ്യമായതെല്ലാം ചെയ്യും. അതേസമയം, യുക്രെയ്‌നും റഷ്യയും തമ്മിലുള്ള വിഷയത്തില്‍ ഇന്ത്യ സ്വീകരിച്ച സമത്വ നിലപാടിന് നന്ദിയുണ്ടെന്നും യുക്രെയ്‌നില്‍ കുടുങ്ങിക്കിടക്കുന്ന ഇന്ത്യക്കാരെ ഒഴിപ്പിക്കാന്‍ മോസ്‌കോയുടെ പിന്തുണയുണ്ടാകുമെന്നും അംബാസിഡര്‍ ഉറപ്പുനല്‍കി.

ഇതിനിടെയുണ്ടായ ദൗര്‍ഭാഗ്യകരമായ സംഭവത്തില്‍, റഷ്യ ശരിയായ അന്വേഷണം നടത്താന്‍ ആഗ്രഹിക്കുന്നുവെന്നും റഷ്യന്‍ പ്രതിനിധി കൂട്ടിച്ചേര്‍ത്തു. ഖാര്‍കീവ് നാഷണല്‍ മെഡിക്കല്‍ യൂണിവേഴ്സിറ്റിയിലെ നാലാം വര്‍ഷ വിദ്യാര്‍ത്ഥിയായിരുന്നു കൊല്ലപ്പെട്ട നവീന്‍. റഷ്യ മുഖേനയും ഇന്ത്യക്കാരെ ഒഴിപ്പിക്കാന്‍ കേന്ദ്രസര്‍ക്കാര്‍ അനുമതി തേടിയിരുന്നു.

ഖാര്‍കീവിലും മറ്റ് കിഴക്കന്‍ യുക്രെയ്‌നിലുമുള്ള ഇന്ത്യക്കാരെ ഒഴിപ്പിക്കാന്‍ നേരിടുന്ന പ്രതിസന്ധിക്ക് ഉപായം തേടിയാണ് റഷ്യയ്‌ക്ക് മുന്നില്‍ ഇന്ത്യയുടെ അഭ്യര്‍ത്ഥനയുണ്ടായത്. ഇക്കാര്യം പരിഗണിക്കുന്നുണ്ടെന്നും അദ്ദേഹം ഉറപ്പുനല്‍കി.