ഹിജാബ് വിരുദ്ധ പ്രക്ഷോഭം ; അലി ഖമ നേയിരുടെ സഹോദര പുത്രി അറസ്റ്റിൽ.

ടെഹ്‌റാന്‍ : ഇറാന്റെ പരമോന്നത നേതാവ് ആയത്തുള്ള അലി ഖമനേയിയുടെ സഹോദരീപുത്രി ഫരീദേ മൊറദ്‌ഖാനിയെ സുരക്ഷാ സേന അറസ്റ്റ് ചെയ്തെന്ന് റിപ്പോര്‍ട്ട്.ഫരീദേ ഖമനേയി ഭരണകൂടത്തിനെതിരെ രൂക്ഷവിമര്‍ശനം ഉന്നയിക്കുന്ന വീഡിയോ പുറത്തുവന്നതിന് പിന്നാലെയാണ് ഫരീദേയെ അധികൃതര്‍ പിടികൂടിയെന്ന് സഹോദരന്‍ ആരോപിച്ചത്. ബുധനാഴ്ചയാണ് ഫരീദേയെ അധികൃതര്‍ തടങ്കലിലാക്കിയതെന്ന് സഹോദരന്‍ പറയുന്നു. ഫരീദേ സര്‍ക്കാരിനെ വിമര്‍ശിക്കുന്ന വീഡിയോ കഴിഞ്ഞ ദിവസം സഹോദരന്‍ യൂട്യൂബില്‍ അപ്‌ലോഡ് ചെയ്തിരുന്നു. ഈ വീഡിയോ എന്ന് റെക്കോഡ് ചെയ്യപ്പെട്ടതാണെന്ന് വ്യക്തമല്ല. വീഡിയോയില്‍ ഇറാന്‍ ജനതയ്ക്കെതിരെ നടക്കുന്ന അടിച്ചമര്‍ത്തലിനെ അപലപിച്ച ഫരീദേ അന്താരാഷ്ട്ര സമൂഹം ഇറാന്‍ ഭരണകൂടത്തെ ഒറ്റപ്പെടുത്തണമെന്ന് ആഹ്വാനം ചെയ്തു. ഖമനേയിയെ ഹിറ്റ്‌ലറുമായാണ് ആക്ടിവിസ്റ്റ് കൂടിയായ ഫരീദേ താരതമ്യപ്പെടുത്തിയത്. ഇതിന് മുമ്ബും ഭരണകൂട വിരുദ്ധ നിലപാടുകളുടെ പേരില്‍ ഫരീദേയെ ജയിലിലടച്ചിട്ടുണ്ട്.