Agriculture

Entertainment

January 31, 2023

BHARATH NEWS

Latest News and Stories

സുപ്രധാന വിധിയുമായി മദ്രാസ് ഹൈക്കോടതി; മത പരിവർത്തിതർക്ക് ജാതി സംവരണം ആവശ്യമില്ല.

ചെന്നൈ:  മതം മാറിയതിന് ശേഷം താന്‍ ജനിച്ച ജാതിയോ സമുദായമോ വ്യക്തിത്വമായി ഉപയോഗിക്കാനാവില്ലെന്നും ജാതിയുടെ അടിസ്ഥാനത്തില്‍ സംവരണം ആവശ്യപ്പെടാന്‍ കഴിയില്ലെന്നും മദ്രാസ് ഹൈക്കോടതി വിധിച്ചു.ഹിന്ദുമതത്തില്‍ നിന്ന് ഇസ്‌ലാമിലേക്ക് മതം മാറിയ യുവാവ്, ജനിച്ച സമുദായത്തിന്റെ അടിസ്ഥാനത്തില്‍ സംവരണ ആനുകൂല്യം ആവശ്യപ്പെട്ട് നല്‍കിയ ഹര്‍ജി തള്ളിക്കൊണ്ടാണ് ജസ്റ്റിസ് ജിആര്‍ സ്വാമിനാഥന്‍ ഈ നിരീക്ഷണം നടത്തിയത്.

ഹിന്ദുവായി ജനിച്ച ഒരാള്‍ ജാതി വ്യവസ്ഥയെ അംഗീകരിക്കാത്ത മറ്റൊരു മതം സ്വീകരിച്ചാല്‍, ആ വ്യക്തി ജനിച്ച ജാതിയില്‍ പെടുന്നത് അവസാനിക്കുമെന്ന് ജസ്റ്റിസ് സ്വാമിനാഥന്‍ സുപ്രീം കോടതി വിധികള്‍ ഉദ്ധരിച്ച്‌ വ്യക്തമാക്കി. വ്യക്തി തന്റെ മതത്തിലേക്ക് തിരികെ മടങ്ങിയെത്തിയാല്‍, ജാതി സ്വത്വവും തിരികെ വരുമെന്നും അയാള്‍ക്ക് അത് ഉപയോഗിക്കാമെന്നും ഹൈക്കോടതി വിധിയില്‍ പറഞ്ഞു.

ഹര്‍ജിക്കാരന്‍ 2008ല്‍ കുടുംബത്തോടൊപ്പം ഇസ്ലാം മതം സ്വീകരിച്ചിരുന്നു. പേരുമാറ്റി ഗസറ്റില്‍ പ്രസിദ്ധീകരിച്ചിരുന്നില്ല. താനും തന്റെ കുടുംബാംഗങ്ങളും ഏറ്റവും പിന്നോക്ക വിഭാഗത്തില്‍ (MBC) പെടുന്ന ഹിന്ദുക്കളാണെന്ന് ഹര്‍ജിക്കാരന്‍ വ്യക്തമാക്കി. 2018 ല്‍, ഇയാള്‍ തമിഴ്നാട് കമ്ബൈന്‍ഡ് സിവില്‍ സര്‍വീസസ് പരീക്ഷ എഴുതിയെങ്കിലും മെറിറ്റ് ലിസ്റ്റില്‍ ഇടം നേടാനായില്ല. ടിഎന്‍ പബ്ലിക് സര്‍വീസ് കമ്മീഷന്‍ ‘ജനറല്‍’ വിഭാഗത്തിലാണ് അദ്ദേഹത്തെ പരിഗണിച്ചത്. ഇതിന് പിന്നാലെയാണ് അദ്ദേഹം ഹൈക്കോടതിയിലെത്തിയത്.

എല്ലാ മുസ്ലീങ്ങളെയും പിന്നോക്ക വിഭാഗത്തില്‍ പെട്ടവരായി തമിഴ്‌നാട് സര്‍ക്കാര്‍ അംഗീകരിക്കുന്നില്ലെന്ന് വാദിച്ച്‌ സംസ്ഥാന സര്‍ക്കാര്‍ ഹര്‍ജിയെ എതിര്‍ത്തു. എസ് റുഹയ്യ ബീഗം കേസില്‍ മദ്രാസ് ഹൈക്കോടതിയുടെ 2013ലെ വിധിയും മദ്രാസ് ഹൈക്കോടതി ഉദ്ധരിച്ചു. മതപരിവര്‍ത്തനത്തിന് ശേഷമുള്ള സംവരണം സംബന്ധിച്ച്‌ സുപ്രീം കോടതിയിലും വാദം കേള്‍ക്കുന്നതിനാല്‍, മദ്രാസ് ഹൈക്കോടതി അതേക്കുറിച്ച്‌ കൂടുതല്‍ പ്രതികരിക്കാന്‍ വിസമ്മതിക്കുകയും ഹര്‍ജി തള്ളുകയും ചെയ്തു.