Agriculture

Entertainment

January 31, 2023

BHARATH NEWS

Latest News and Stories

ഒമാനിൽ പുരാതന നഗരവശിഷ്ടങ്ങൾ കണ്ടെത്തി.

മസ്‌കറ്റ്: ബിസി ഒന്നാം സഹസ്രാബ്ദത്തോളം പഴക്കമുള്ള പുരാതന നഗരത്തിന്റെ അവശിഷ്ടങ്ങൾ അൽ ദാഹിറ ഗവർണറേറ്റിൽ കണ്ടെത്തി. ദാഹിറ ഗവര്‍ണറേറ്റിലെ ധങ്ക് വിലായത്തില്‍ നടത്തിയ പുരാവസ്തു ഖനനത്തിലാണ് ഇവ കണ്ടെത്തിയിട്ടുള്ളത്.ധങ്കിലെ ഐന്‍ ബാനി സൈദ പുരാവസ്തു സൈറ്റില്‍ പൈതൃക വിനോദസഞ്ചാര മന്ത്രാലയവും വാഴ്സോ സര്‍വകലാശാലയില്‍ നിന്നുള്ള പോളിഷ് സംഘവുമായിരുന്നു ഖനനം നടത്തിയത്. ബി.സി ഒന്നാം സഹസ്രാബ്ദത്തോളം പഴക്കമുള്ളതാണ് കണ്ടെത്തിയ സ്ഥലമെന്നാണ് അനുമാനിക്കുന്നത്.

കൈകൊണ്ട് നിര്‍മിച്ച്‌ അലങ്കരിച്ച മണ്‍പാത്രങ്ങള്‍, ഗോവണി, പാചക സ്റ്റൗ എന്നിവയും കണ്ടെത്തിയവയില്‍ ഉള്‍പ്പെടുന്നുണ്ട്. ഒരു വലിയ നഗരത്തിന്‍റെ തനിപ്പകര്‍പ്പാണ് കണ്ടെത്തിയിട്ടുള്ളതെന്നും ഇത് അക്കാലത്തെ സാമൂഹിക സാഹചര്യം പ്രതിഫലിപ്പിക്കുന്നുണ്ടെന്നും വാര്‍സോ സര്‍വകലാശാലയിലെ ഡോ. പീറ്റര്‍ ബെലിന്‍സ്‌കി പറഞ്ഞു. പൈതൃക വിനോദസഞ്ചാര മന്ത്രാലയവും വാഴ്‌സ സര്‍വകലാശാലയില്‍ നിന്നുള്ള സംഘവും പുതിയ പുരാവസ്തു സൈറ്റില്‍ ഗവേഷത്തിനും പഠനങ്ങള്‍ നടത്തുന്നതിനുമായി ഖനനം നടത്തി കൊണ്ടിരിക്കുകയാണ്. ഈ സ്ഥലത്തിന് ഹജര്‍ പര്‍വതനിരകളിലെ ബാറ്റ്, ബഹ്ലൈയിലെ സലൂട്ട്, സഹമിലെ ദഹ്വ തുടങ്ങിയ പുരാവസ്തു സ്ഥലങ്ങളുമായി ചരിത്രപരമായ ബന്ധമുണ്ടെന്ന് ദാഹിറ ഗവര്‍ണറേറ്റിലെ ഹെറിറ്റേജ് ആന്‍ഡ് ടൂറിസം വകുപ്പ് ഡയറക്ടര്‍ അലി ബിന്‍ ഖമീസ് അല്‍-സുദൈരി പറഞ്ഞു.