ആധാറും വോട്ടര്‍ ഐ.ഡിയും ബന്ധിപ്പിക്കാന്‍ നിയമനിര്‍മാണവുമായി കേന്ദ്രം

ന്യൂഡല്‍ഹി: ആധാര്‍ കാര്‍ഡും തിരഞ്ഞെടുപ്പ് തിരിച്ചറിയല്‍ കാര്‍ഡും തമ്മില്‍ ബന്ധിപ്പിക്കാനുള്ള നിയമനിര്‍മാണത്തിനൊരുങ്ങി കേന്ദ്രം. കള്ളവോട്ട് നിയന്ത്രിക്കുന്നതിനായി പുതിയ ആധാര്‍ അപേക്ഷകരുടെയും നിലവിലുള്ള അപേക്ഷകരുടെയും ആധാര്‍ നമ്പറുകള്‍ ശേഖരിക്കാന്‍ നിയമനിര്‍മാണം വേണമെന്ന തിരഞ്ഞെടുപ്പു കമ്മിഷന്റെ നിര്‍ദേശമനുസരിച്ചാണ് നടപടി.

1951 ലെ ജനപ്രാതിനിധ്യ നിയമം ഭേദഗതി ചെയ്യാനുള്ള സാഹചര്യങ്ങള്‍ പരിശോധിച്ച് നിയമ മന്ത്രാലയം പ്രധാനമന്ത്രി അധ്യക്ഷനായ സമിതിക്ക് റിപ്പോര്‍ട്ട് നല്‍കും. ഇത് പഠിച്ച് നിയമനിര്‍മാണത്തിനുള്ള ബില്‍ പാര്‍ലമെന്റില്‍ അവതരിപ്പിക്കുമെന്നും മന്ത്രാലയം വ്യക്തമാക്കി.

നിര്‍ദിഷ്ട ഭേദഗതിയനുസരിച്ച് പൗരന്മാര്‍ തങ്ങളുടെ ആധാര്‍നമ്പര്‍ വോട്ടര്‍ തിരിച്ചറിയല്‍ കാര്‍ഡുമായി ബന്ധിപ്പിക്കണം. കഴിഞ്ഞ ഓഗസ്റ്റിലാണ് ഇതുസംബന്ധിച്ച് തിരഞ്ഞെടുപ്പുകമ്മിഷന്‍ കേന്ദ്രത്തിന് നിര്‍ദേശം നല്‍കിയത്. ജനുവരി 31 ന് ആരംഭിക്കുന്ന ബജറ്റ് സമ്മേളനത്തിനുശേഷം നിയമനിര്‍മാണവുമായി മന്ത്രാലയം മുന്നോട്ടുപോകും.

വോട്ടര്‍ ഐ.ഡിയുമായി ആധാര്‍ ബന്ധിപ്പിക്കാനുള്ള നിര്‍ദേശം തിരഞ്ഞെടുപ്പു കമ്മിഷന്‍ നേരത്തെ മുന്നോട്ടു വെച്ചിരുന്നു. എന്നാല്‍, ആധാര്‍ നിര്‍ബന്ധമാക്കരുതെന്ന 2015 ലെ സുപ്രീംകോടതി വിധിയെത്തുടര്‍ന്ന് തീരുമാനം മാറ്റുകയായിരുന്നു.