കോവിഡ് സ്ഥിതി അറിയാൻ നരേന്ദ്രമോദി നേരിട്ട് വിളിക്കും

ന്യൂഡൽഹി ∙ രാജ്യത്തെ കോവിഡ് ബാധ ജനജീവിതത്തെ എത്രത്തോളം ബാധിച്ചുവെന്ന് മനസ്സിലാക്കാൻ പ്രധാനമന്ത്രി നരേന്ദ്ര മോദി ദിവസവും 200 പേരുമായി ആശയവിനിമയം നടത്തുന്നു. ഗവർണർമാർ, മുഖ്യമന്ത്രിമാർ, ആരോഗ്യമന്ത്രിമാർ എന്നിവർക്കു പുറമേ, ആരോഗ്യ പ്രവർത്തകരോടും മോദി ഫോണിലൂടെ കാര്യങ്ങൾ അന്വേഷിക്കുന്നുണ്ട് . വിഡിയോ കോൺഫറൻസിങ് വഴിയാണ് സമൂഹത്തിലെ പ്രധാനപ്പെട്ട ആരോഗ്യ വിദഗ്ധരിൽ നിന്നും നരേന്ദ്രമോദി ആശയങ്ങൾ ക്ഷണിച്ചിരിക്കുന്നത് .

കഴിഞ്ഞ ദിവസം പൂനെയിലെ കോവിഡ് കേന്ദ്രത്തിലെ നേഴ്സിനെ മോദി ഫോണിൽ വിളിച്ചതും വാർത്തയായിരുന്നു.അതേസമയം ലോക്ഡൗൺ കാലത്തു ആളുകൾക്കു നേരിടേണ്ടി വരുന്ന മാനസിക പ്രശ്നങ്ങൾക്ക് പരിഹാരം നൽകാൻ ബെംഗളൂരു നിംഹാൻസുമായി ചേർന്ന് ആരോഗ്യമന്ത്രാലയം പദ്ധതിയും തയാറാക്കി. ടോൾ ഫ്രീ നമ്പർ– 08046110007.

കോവിഡ് സ്ഥിരീകരിച്ചവരെ പ്രത്യേകം ബ്ലോക്കുകളിലും ആശുപത്രികളിലുമായി മാറ്റുന്ന നടപടി തുടങ്ങിയതായി ആരോഗ്യമന്ത്രാലയം അറിയിച്ചു. ഐസലേഷൻ കർശനമായി നടപ്പാക്കാണു തീരുമാനം.113 സർക്കാർ ലാബുകൾ പ്രവർത്തന സജ്ജമാണ്. സ്വകാര്യ മേഖലയിൽ 47 ലാബുകൾക്കു പരിശോധനാനുമതി നൽകി.ഇന്നലെ വരെ 34931 സാംപിളുകളാണ് കോവിഡ് പരിശോധനയ്ക്കു വിധേയമാക്കിയതെന്നു ഐസിഎംആർ അറിയിച്ചു.