സംവിധായകനും തിരക്കഥാകൃത്തുമായ സച്ചി അന്തരിച്ചു

കൊച്ചി: സംവിധായകനും തിരക്കഥാകൃത്തുമായ സച്ചി (സച്ചിദാനന്ദന്‍) അന്തരിച്ചു. തൃശൂരിലെ സ്വകാര്യ ആശുപത്രിയില്‍ രാത്രി 9.30 നായിരുന്നു അന്ത്യം. 48 വയസ്സായിരുന്നു. ഹൃദയാഘാതത്തെ തുടര്‍ന്ന് ആശുപത്രിയില്‍ പ്രവേശിപ്പിച്ച സച്ചി വെന്റിലേറ്ററിലായിരുന്നു. രക്തസമ്മര്‍ദ്ദം നിയന്ത്രിച്ചു നിര്‍ത്താനുള്ള മരുന്നുകളും നല്‍കിയിരുന്നു. ഏതാനും ദിവസങ്ങള്‍ക്കു മുന്‍പ് ഇടുപ്പ് മാറ്റിവെക്കല്‍ ശസ്ത്രക്രിയയ്ക്കു സച്ചി വിധേയനാക്കിയിരുന്നു. അതിനുശേഷമാണ് അദ്ദേഹത്തിനു ഹൃദയാഘാതം സംഭവിച്ചത്. സംസ്‌കാരം നാളെ കൊച്ചി രവിപുരം ശ്മശാനത്തില്‍ നടക്കും.

തൃശൂര്‍ ജില്ലയിലെ കൊടുങ്ങല്ലൂരില്‍ ജനിച്ച കെ.ആര്‍. സച്ചിദാനന്ദന്‍ എന്ന സച്ചി എട്ടു വര്‍ഷം ഹൈക്കോടതിയില്‍ അഭിഭാഷകനായിരുന്ന ശേഷമാണ് സിനിമയിലേക്കെത്തിയത്. എഴുതിയ തിരക്കഥകളില്‍ ഭൂരിഭാഗവും ഹിറ്റുകളാക്കിയ സച്ചി സംവിധാനം ചെയ്ത രണ്ടു ചിത്രങ്ങളും ബോക്‌സോഫീസ് ഹിറ്റുകളായിരുന്നു. അടുത്ത കാലത്ത് ഏറ്റവുമധികം ചര്‍ച്ച ചെയ്യപ്പെട്ട അയ്യപ്പനും കോശിയുമാണ് അവസാന ചിത്രം.

കോളജ് പഠനകാലത്ത് ഫിലിം സൊസൈറ്റിയിലും നാടക പ്രവര്‍ത്തനങ്ങളിലും സജീവമായിരുന്നു. മുപ്പതോളം അമച്വര്‍ നാടകങ്ങള്‍ സംവിധാനം ചെയ്തു. നിരവധി നാടകങ്ങളില്‍ അഭിനയിച്ചിട്ടുമുണ്ട്. പുണെ ഫിലിം ഇന്‍സ്റ്റിറ്റിയൂറ്റില്‍ സിനിമ പഠിക്കാനായിരുന്നു ആഗ്രഹമെങ്കിലും കുടുംബത്തിന്റെ അനുവാദമില്ലാത്തതിനാല്‍ നടന്നില്ല. സിഎയ്ക്കു പഠിക്കുന്നതിനിടെയാണ് നിയമവും പഠിച്ചത്. പിന്നെ ഹൈക്കോടതിയില്‍ പ്രാക്ടീസ് ചെയ്തു. അക്കാലത്താണ് സേതുവുമായി അടുപ്പമുണ്ടായതും ഒരുമിച്ച് സിനിമ ചെയ്യാന്‍ പദ്ധതിയിട്ടതും.

2007 ല്‍ പൃഥ്വിരാജ് ചിത്രം ചോക്കലേറ്റിന് സുഹൃത്ത് സേതുവുമായി ചേര്‍ന്ന് തിരക്കഥയെഴുതിയാണ് സിനിമയിലേക്കെത്തിയത്. തുടര്‍ന്നുവന്ന റോബിന്‍ ഹുഡ്, മേക്കപ്പ് മാന്‍, സീനിയേഴ്‌സ് എന്നീ ചിത്രങ്ങളും വിജയമായിരുന്നു. ഡബിള്‍സ് എന്ന ചിത്രത്തിനു ശേഷം 2012 ല്‍ സേതുവുമായി പിരിഞ്ഞു.

റണ്‍ ബേബി റണ്‍ എന്ന മോഹന്‍ലാല്‍ ചിത്രത്തിന് സച്ചി തിരക്കഥയൊരുക്കി. 2012 ല്‍ ചേട്ടായീസ് എന്ന സിനിമയുടെ നിര്‍മാണത്തില്‍ പങ്കാളിയായി. 2015 ല്‍ പുറത്തുവന്ന അനാര്‍ക്കലിയിലൂടെയാണ് സംവിധായകനായത്. 2017 ല്‍ അരുണ്‍ഗോപിക്കു വേണ്ടി എഴുതിയ ദിലീപ് ചിത്രം രാമലീലയും വിജയമായി.

2019 ല്‍ ജീന്‍പോള്‍ ലാല്‍ സംവിധാനം ചെയ്ത ഡ്രൈവിങ് ലൈസന്‍സിന്റെയും തിരക്കഥ സച്ചിയാണ് ഒരുക്കിയത്. പൃഥ്വിരാജും സുരാജ് വെഞ്ഞാറമൂടും പ്രധാന വേഷങ്ങളിലെത്തിയ ചിത്രം വന്‍വിജയമായിരുന്നു. തുടര്‍ന്ന് സച്ചി സംവിധാനം ചെയ്ത അയ്യപ്പനും കോശിയും പ്രേക്ഷകരുടെ കയ്യടി നേടി. ബിജുമേനോനും പൃഥ്വിരാജും ടൈറ്റില്‍ റോളുകളിലെത്തിയ ചിത്രം മറ്റു ഭാഷകളില്‍ റീമേക്കിന് ഒരുങ്ങുന്നതും വലിയ വാര്‍ത്തയായിരുന്നു.