ഇന്ത്യൻ മണ്ണിൽ കണ്ണ് വച്ചാൽ തക്ക മറുപടി നൽകിയിരിക്കും ; ചൈനയ്ക്ക് മുന്നറിയിപ്പ് നൽകി പ്രധാനമന്ത്രി നരേന്ദ്രമോദി

ന്യൂഡൽഹി ; ഇന്ത്യൻ മണ്ണിൽ കണ്ണ് വച്ചവർക്ക് ഉചിതമായ മറുപടി നൽകിയതായി പ്രധാനമന്ത്രി നരേന്ദ്ര മോദി. പ്രകോപനങ്ങൾക്ക് എങ്ങനെ മറുപടി നൽകണമെന്ന് അറിയാം. ഇന്ത്യയുടെ അതിർത്തി സംരക്ഷിക്കാന്‍ എന്നും പ്രതിജ്ഞാബദ്ധമാണ്. – മൻ കി ബാത്ത് റേഡിയോ പരിപാടിയില്‍ പ്രധാനമന്ത്രി പറഞ്ഞു.

ഒരേ സമയം രാജ്യം നിരവധി വെല്ലുവിളികൾ നേരിടുകയാണ് . അതിർത്തിയും പരമാധികാരവും സംരക്ഷിക്കുന്നതിനുള്ള ഇന്ത്യയുടെ പ്രതിബദ്ധത ലോകം കാണുന്നുണ്ട്. നമ്മുടെ പ്രദേശങ്ങൾ ആഗ്രഹിച്ചവർക്കുള്ള മറുപടി ലഡാക്കിൽ കൊടുത്തിട്ടുണ്ട്.

ലഡാക്കിൽ വീരമൃത്യുവരിച്ച ധീര സൈനികർക്കു മുന്നിൽ ഇന്ത്യ പ്രണമിക്കുകയാണ്. അവരുടെ ശൗര്യം എപ്പോഴും ഓർമിക്കപ്പെടും. മക്കളെ നഷ്ടപ്പെട്ട കുടുംബങ്ങൾ അവരുടെ മറ്റു മക്കളെ കൂടി സൈന്യത്തിലേക്ക് അയക്കാൻ തയാറാണ്. അവരുടെ ത്യാഗം ആദരണീയമാണ്.

ജനങ്ങളെല്ലാം ഏറെ വെല്ലുവിളികൾ നിറഞ്ഞ വർഷമായാണ് 2020നെ കാണുന്നത്. എന്നാൽ എല്ലാ വെല്ലുവിളികളെയും നമ്മൾ മറികടന്നിട്ടുണ്ടെന്നാണു ചരിത്രം കാണിച്ചുതരുന്നത്. വെല്ലുവിളികള്‍ക്കപ്പുറം നമ്മൾ കരുത്തരായി ഉയർന്നു വന്നിട്ടുണ്ട്.

ലോക്ഡൗണുമായി താരതമ്യപ്പെടുത്തുമ്പോൾ അൺലോക്കില്‍ നമ്മൾ കൂടുതൽ സൂക്ഷിക്കണം. മാസ്ക് ധരിക്കാതെ, സാമൂഹിക അകലം പാലിക്കാതെ ഇരുന്നാൽ നിങ്ങൾ നിങ്ങളെയും മറ്റുള്ളവരെയും അപകടത്തിലാക്കുകയാണ്. ജനങ്ങൾ മാർഗനിർദേശങ്ങൾ‌ പൂർണമായും പാലിക്കണമെന്നും പ്രധാനമന്ത്രി ആവശ്യപ്പെട്ടു.